XXXV CAMPAMENTO URBANO, VIVIR VIGO EN AGOSTO

O Centro Xuvenil Abertal non para nin no mes de agosto. De feito, do 31 de xullo ao 11 de agosto organizou unha das actividades con máis tradición, o Campamento Urbano, que neste 2023 chegou á súa edición número 35. Unha vez máis cumpriu o seu obxectivo de ser unha proposta aberta á cidade, totalmente libre e cento por cento gratuíto.

Así, durante dúas semanas participaron, como verdadeiros protagonistas, un bo número de rapaces e rapazas organizados en grupos por idades de 7 a 15 anos e acompañados por un nutrido grupo de voluntariado cheo de ilusión. Pero os de Vigo non foron os únicos en contar co seu Campamento Urbano. Así quedou demostrado na Xuntanza de Campamentos Urbanos de Galicia, que se celebrou na praia de Samil o 3 de agosto, reunindo a máis de mil participantes nos campamentos urbanos da Federación de Centros Xuvenís Don Bosco de Galicia. Xogos de auga, obradoiros, actividades en diferentes barrios da cidade, unha excursión a Cangas… completaron esta experiencia única de verán. Unha proposta que se consolida e que atendeu á conciliación familiar, ampliando o horario habitual de actividades para quen o precisaba.

Campamento Urbano con 35 anos de historia

Parecen poucos, pero xa son unha chea de anos facendo realidade esta proposta de tempo libre educativo, sen renunciar ás orixes. Un campamento urbano libre, gratuíto e aberto. Un campamento na cidade como recurso de lecer, no que os rapaces e rapazas sexan os verdadeiros protagonistas.

Por segundo ano consecutivo, volvemos organizar o campamento nas instalación do colexio salesiano Mª Auxiliadora, do 31 de xullo ao 11 de agosto, e contaremos cun nutrido grupo de voluntariado, que contaxiarán de ilusión as actividades deste verán.

A inscrición estará aberta, mesmo durante o desenvolvemento do propio campamanento, para rapaces e rapazas de 7 a 15 anos.

As actividades serán variadas: paseos polos barrios da cidade, xogos de auga, obradoiros, viaxe en barco pola ría, xogos en grupo, actividades na natureza, praia e xuntanza cos outros campamentos urbanos da Federación de Centros Xuvenís Don Bosco de Galicia.

Todo en marcha para esta nova edición, que tamén atenderá as necesidades de conciliación das familias, con servizos de Madrugadores e Friameira, e que pretende ser unha oportunidade para rapaces e rapazas que non poden participar noutros campamentos este verán.

Xuntanza Saltimbanquis, Andaina e ADS – 6 maio 2023

Os grupos de Saltimbanquis, Andaina e ADS de toda Galicia reuníronse a pasada fin de semana para celebrar a súa Xuntanza. Ano a ano, preto da festividade de Domingo Savio (6 de maio), os grupos infantís do Itinerario de Educación na Fe, reservan unha xornada festiva na que encontrarse antes dos campamentos, coñecendo novos animadores e animadoras doutros centros xuvenís e facendo novas amizades de diferentes cidades.

Tal era a emoción do día que chegaron máis cedo do que agardado, así que lle deron a benvida a todos os centros xuvenís no patio do cole salesiano da Coruña. Preparados e preparadas para gozar dun día enchido de diversión, xogo e bo ambiente, aproveitaron tamén para facer toda a festa posible xa que se celebraban os 30 anos de Abeiro! Parabéns compañeiras!

ADS empeñouse a fondo en descubrir a cidade da Coruña coa excusa de “Recalcular a ruta”. Unha morea de xogos polas diferentes prazas emblemáticas e momentos de convivencia se convertiron na excusa perfecta para estar cos amigos e amigas ADS.

Andaina pasou unha xornada inesquecible no Andaina’s Film Festival; actividades lúdicas polo paseo da praia de Orzán, nas que descubrir os entramados dunha boa película, nos que os e as protagonistas eran indiscutibles.

Saltimbanquis celebrou a Olimpíada de Heracles, incluso coa participación de galos e romanos, unha temática que nos presenta Pablo como amante dos deportes. Pero non vos pensedes, o verdadeiro protagonista foi o compañeirismo xurdido entre diferentes grupos para poder superar os obstáculos que se lles foron propoñendo.

Voltaron ledos a Vigo con ganas de compartir o vivido, e unha mostra delo son estas imaxes.

Se queres seguir lendo, no Boletín Salesiano podes enterarte de máis cousas.

60 nenos e nenas gozaron das Mañás de Semana Santa

Un ano máis, Abertal organizou as XI Mañás de Semana Santa, campamento de conciliación, neste período de vacacións escolares, e aberto á cidade, para nenos e nenas de 3 a 12 anos. Nesta edición participaron en torno a 60 nenos e nenas, que gozaron das súas vacacións de Semana Santa en Abertal.

As actividades daban comezo ás 08:45 h, e remataban ás 13:30 h, aínda que tamén se ofreceron os servizos de Madrugadores e Friameira.

O luns 3 de abril comezamos cunha xornada de xogos de presentación, onde os rapaces e as rapazas de cada grupo puideron coñecerse un pouquiño, xa que ían compartir tempo de xogo durante todo o campamento. Na segunda parte da mañá, para dar a benvida á primavera, fixemos unha sesión de relaxación, e tamén houbo ocasión para aprender a plantar nunhas macetiñas; primeiro as decoraron ao seu gusto e despois plantaron cebolas, amapolas e xirasoles.

O martes 4 de abril comezou cunha saída ao Castro, na procura de elementos da natureza que, unha vez localizados, foron devoltos a ela. Na segunda parte da mañá, despois da relaxación, os rapaces e rapazas participaron nun circuíto no que puxeron a proba a súa puntería.

Comezamos o 5 de abril cunha xincana, a través dun circuíto, superando unha serie de obstáculos. Despois tocou merendar, tempo de relaxación e sesión de cociña; puxémonos mans á obra cos ósos de santo.

Á volta dos festivos, o luns 10 de abril, volvemos ao Castro, pasando a mañá alí, xogando e merendando. A segunda parte da xornada, xa en Abertal, realizamos a última actividade do campamento, na procura dos ovos de Pascua polas instalacións do patio do colexio Salesianos.

Seguinte parada, Mañás de Verán!

Vémonos na vindeira cita, para seguir apoiando ás familias e gozar coas rapazas e rapaces dun tempo libre lúdico e educativo!

Vigo Inclusivo: Campamento Semana Santa

A Asociación Centro Xuvenil Abertal vén de asinar un convenio coa Concellería de Política de Benestar Social do Concello de Vigo, no marco do programa municipal Vigo Inclusivo, dirixido a persoas con discapacidade do Concello de Vigo.

Este ano, por vez primeira, levouse a cabo un campamento en período non lectivo de Semana Santa, no que un bo grupo de persoas puido gozar dunha diversidade de actividades lúdicas e de lecer.

As actividades desenvolvéronse no entorno da praia de Samil, aproveitando as instalacións municipais do Museo Verbum, e gozando do bo tempo que acompañou esta Semana Santa.

Dentro do programa municipal de actividades propostas para estes días, unha das máis significativas foi a participación nos obradoiros de Inmersia, un centro de ocio e realidade virtual, onde os nosos mozos e mozas accederon a simuladores de xogos variados, de condución de coches de carreiras ou mesmo dunha montaña rusa!

Este programa municipal Vigo Inclusivo ten previsto ofrecer novas actividades de tempo libre nos meses de verán e na época de Nadal, proporcionando tamén un merecido descanso ás familias e coidadores/as das persoas participantes.

OperaciónQuilo 2022

O Centro Xuvenil Abertal sumouse ao Nadal Solidario da Obra salesiana de María Auxiliadora de Vigo. Recollida de alimentos específica do mes de decembro para contribuir con Cáritas parroquial e encher a cesta de alimentos, tamén con produtos de Nadal.

O pasado 2 de decembro comezaba a andar a campaña de recollida de alimentos co torneo de baloncesto solidario, unha semana máis tarde, os grupos de Iniciación e Catecumenado facían o buzoneo para que toda a veciñanza estivera informada, e promover a colaboración devarias entidades e establecementos do barrio. O Centro Xuvenil Abertal, entidade socia fundadora da Federación de Centros Xuvenís Don Bosco de Galicia, promove esta actividade desde os anos oitenta (“Operación Trigo”), pero este ano máis ca nunca xa que víronse incrementadas as peticións achegando alimentos a 221 persoas.
Un bo equipo de voluntarios e voluntarias seguiron de preto a recollida de alimentos  e agradeceron sobre todo a achega de produtos e doces típicos do Nadal, que permitiron entregar ás familias do barrio un paquete tan especial como especiais son estas datas.
Tentamos visibilizar tanto as necesidades como a solidariedade nas distancias máis curtas, tamén neste barrio do centro da cidade.

A xornada de recollida, clasificación e transporte rematou coa Oración Aberta e posterior chocolate e karaoke!

Moitas gracias ás 83 persoas que botaron unha man no Obradoiro de Solidariedade e a outras moitas que aportaron o seu graniño de area, facendo posible a organización e transporte dos 900 Kg destinados ás 71 familias que atende Cáritas todos os meses.

Club de ocio

O proxecto Club de Ocio para persoas con discapacidade comezou de novo en xaneiro deste ano 2022. Desta volta coa axuda económica da Deputación de Pontevedra. As actividades de lecer desenvólvense varios sábados ao mes. O grupo de participantes inscríbese de luns a mércores, previo ao día de actividade. E os sábados saímos a gozar da variada oferta de ocio e tempo libre na cidade de Vigo. Este ano, entre outras moitas actividades, asistimos a partidos de baloncesto adaptado no pavillón Pablo Beiro de Bouzas, unha viaxe en barco a Cangas, un divertido día de praia e xeados, tamén gozamos do ambiente da Festa da Reconquista, ou dunha divertida partida de bolos, acompañado duns refrescos ou merenda, e unha boa conversa da man das persoas voluntarias, que sempre poñen o mellor de si para que estas actividades sexan todo un éxito.

Despois do parón do verán, este novo curso escolar continuamos coas actividades habituais. Novas caras, vellas amizades e, sobre todo, moita ilusión e ganas de pasalo ben!

  • dav
  • dav
  • dav
  • dav
  • dav
  • mde

VII Magosto Rock – 12 novembro 2023

Preto dun cento de participantes xuntáronse polo san Martiño en Abertal para a celebración do Magosto Rock na súa séptima edición.

Desde as primeiras horas da tarde, e tralas reunións de Catecumenado, as mozas e mozos implicados na organización do evento estaban rebumbiando e ultimando detalles para a noite: compras de última hora, revisión de reservas, aparellos musicais, ensaios… mais so cando se acendeu o lume e o fume comezou a campear polo patio de abertal, comezaba realmente o Magosto.

Chourizos, criollos, castañas, fixeron entrar en calor a todas as presentes. Mais a festa non remataba coa comida… había concerto!! Máis de dúas horas de música, con continuación de baile e karaoke, foron alongando o encontro ata pasada a media noite.

Bo ambiente, cea enxebre, participación xuvenil, festa entre todas e todos!

Botádelle un ollo a algunhas das fotos que puideron facer.

Viva o Magosto, viva o MagostoRock!!!

Asemblea A. Vaivén – 10 setembro 2022

Na fin de semana do 10 e 11 de setembro de 2022, unha representación do equipo de animadores e animadoras de Alternativa Vaivén xuntámonos para celebrar a nosa asemblea de inicio de curso. Foron dúas xornadas caracterizadas pola convivencia, nas que tivemos unha gran variedade de momentos. Comezaron no Cine Teatro Salesianos coa visualización dunha obra de teatro de @teatrosinpapeles, na que se representou dunha maneira enxeñosa pero intensa, a complexa realidade de moitas persoas migrantes no noso país, e os prexuízos ou estereotipos fixados cara este colectivo. Trala comida compartida na nosa sala de xogos, nos diriximos ao albergue da Granxa Escola Serantellos, un espazo espectacular no que puidemos traballar e programar o curso rodeado de natureza. Aproveitamos os momentos máis distendidos para poñernos ao día sobre como foi o verán (campamentos, voluntariado, viaxes, aprendizaxes, descanso, etc.). Xa chegaba a tardiña e co cansancio acumulado, buscando un tempo de repouso, tivemos un momento de oración onde compartir inquedanzas, decubrir o noso servicio para este curso. E como broche final, a soleada mañá do domingo a aproveitamos para gozar da contorna, e que mellor que un paseo por parellas en kayak desde a Illa de Arousa ata o Areoso, onde nos bañamos, xogamos e visitamos todos os recunchos da illa!
Podemos asegurar que con esta fin de semana, os animadores e animadoras de A. Vaivén comezamos coas pilas cargadas! e con estas fotos damos fe delo.

Un urbano máxico

Quen coñece a traxectoria do noso centro xuvenil pode facerse unha idea de por que hai actividades que se converten en máxicas.

Cando a escasos dez días de comezar esta nova edición do campamento urbano, se nos comunica que mudan as “regras de xogo”, e que temos que botar a andar un campamento desde cero, en novas instalacións e facendo unha nova convocatoria, pouca xente confiaba en que isto fose factible.

En tempo récord deseñamos un cartel e fixemos convocatoria a través das nosas redes sociais e o boca a boca, que foi o que realmente funcionou. E aí xurdiu o milagre… 170 incricións, cunha media diaria de 120 persoas participantes, e unha proposta xeitosa de actividades.

Ver gozar a rapaces e rapazas dunha simple viaxe en barco, de Vigo a Cangas porque, se cadra, había quen nunca viaxara en barco… Iso é maxia.

Ver compartir verán a rapaces e rapazas de diversas procedencias, mesmo de Ucraína, e ver que hai un idioma común e de entendemento, que é o do xogo e a diversión… Iso é maxia.

Ver como o equipo de 75 persoas voluntarias se reinventaba cada día para ilusionar a estes rapaces e rapazas… Disfraces, coreografías, personaxes, aventuras, retos e máis retos… Ese mesmo equipo, que varias tardes á semana participaba no Urbano Xuvenil, como persoas destinatarias, coa mesma ilusión que un neno/a, descansando pouco e madrugando moito para o día seguinte… Un equipo incansable, dispoñible, que celebrou cada momento deste campamento e que chegou a converterese nunha pandilla de amigos e amigas… Iso é maxia.

Contar co apoio desinteresado de varias familias e particulares que fixeron varias doazóns para este campamento urbano, e conseguir que saia un pouco menos deficitario… Iso é maxia.

Grazas á cidadanía que confía no noso xeito de facer as cousas, no noso estilo educativo, que nos felicita polo traballo feito e que apoia as nosas iniciativas, ano tras ano, verán tras verán!

1 2 3 4 … 24