Mañás de Semana Santa 2022

O Centro Xuvenil Abertal recibiu a 41 nenos e nenas nas “Mañás de Semana Santa”

O luns 15 de Abril co motivo das vacacións de Semana Santa, comezabamos na Asociación Xuvenil Abertal (sita Rúa Venezuela 3 baixo), socia fundadora da Federación de Centros Xuvenís Don Bosco de Galicia, as X Mañás de Semana Santa para os pequenos/as da casa.

Foi un campamento infantil, para nenos de 3 a 12 anos, aberto á cidade, que durou catro días, coincidindo coas vacacións escolares.

Esta ano, foi a décima edición do campamento, no que 41 nenos e nenas gozaron das súas vacacións de Semana Santa en Abertal. Deste xeito, as familias puideron conciliar a súa vida laboral e familiar, e os nenos e nenas divertíronse e coñeceron a novos amigos e amigas.

Actividades coma xincanas polo Castro, grandes xogos, obradoiros de cociña ou xa a tradicional procura dos ovos de Pascua fixeron as delicias dos participantes durante os catro días de actividade.

Nenos e animadores xuntáronse cada día, dende as 8,45 h. da mañá ata as 14,15 h. da tarde para gozar dos diferentes obradoiros e xogos.

Así que nestas vacacións o centro xuvenil deu a benvida polas mañás a rapaces e rapazas da contorna. Queremos que Abertal sexa un lugar para imaxinar, descubrir e crear, fomentar a creatividade, o compañeirismo e traballo en equipo, rir … sen dúbida, de todo menos aburrirse.
Pincha aquí para ver as imaxes.

Pascua no Camiño 2022

Chegados de diferentes cidades da Inspectoría Salesiana Santiago El Mayor, dábanse cita en Lalín 13 mozas, mozos, e non tan mozos. Chegar a Compostela era un dos obxectivos pero non o único.

No Xoves Santo comezaba a andaina, coa máxima do día ao redor do amor fraterno camiñaban. Xa en Bandeira, tempo para o descanso e celebración dos oficios xunto coa comunidade parroquial, animando cos cantos. Xornada para coñecerse xa que cada quen chegaba de diferentes realidades salesianas.

O duro tramo do Venres Santo remataba en Outeiro, con tempo para gozar das vistas do Pico Sacro. Antes do descanso, participaron na reconciliación á tardiña. Un lugar espectacular cunha climatoloxía inmellorable daba pe á contemplación.

O sábado chegaban a Compostela, coa esperanza da Pascua pero coa ledicia contida ata a noitiña, na que a auga e o lume daban sinais de Vida Nova. Sumándose á celebración parroquial de Quinta Angustia con cantos e presencia activa dábamos por rematada a “peregrinación” da Semana Santa, pero comezaba a celebración da Pascua.

A noite convertíase en festa e cea compartida celebrando a Pascua, con pouco descanso, que se notaba á mañá seguinte. A mañá do domingo dedicárona a gozar de Compostela, a comentar o milleiro de anécdotas do camiño; da que dan mostra as fotos.

Daban por rematada a experiencia cun xantar Pascual, saboreando a boa gastronomía galega, coa promesa de volver cada quen á súa cidade, casa salesiana, etc. notándoselles “na frente unha estrela, no bico un cantar”!

Animadas e animados a seguir facendo camiño…

Ultreia e Suseia!

Feliz Pascua!

Mañás de Entroido – 2 marzo 2022

Un ano máis, abrimos as nosas portas aos pequenos da casa nas “X Mañás de Entroido”. Un campamento infantil, para nenos de 3 a 12 anos, aberto á cidade, este ano de tres días, coincidindo coas vacacións escolares de Entroido.

Esta ano, foi a décima edición do campamento, no que 50 nenos e nenas gozaron das súas vacacións de Entroido en Abertal. Deste xeito, as familias puideron conciliar a súa vida laboral e familiar.

Nenos e animadores xuntáronse cada día, dende as 8,45 h. da mañá ata as 14,15 h. da tarde para gozar dos diferentes obradoiros e xogos. Por exemplo creación de disfraces, de máscaras, de obradoiros de reciclaxe, busca do tesouro, maquillaxe, xogos cooperativos, …

Así que nestas vacacións o centro xuvenil deu a benvida polas mañás a rapaces e rapazas de toda a cidade. Queremos que Abertal sexa un lugar para imaxinar, descubrir e crear, fomentar a creatividade, o compañeirismo e traballo en equipo, rir … de todo menos aburrirse.

Vémonos nas Mañás de Semana Santa!!!!

Para ver as fotos pincha aquí

A maxia de Don Bosco

Que Xoán Bosco é patrono da xente da maxia e de ilusionistas, xa o sabiamos. Que sempre en xaneiro celebramos as súas festas, tamén era coñecido. Por iso, un ano máis, o noso centro xuvenil encheuse de vida e ledicia. E a maxia de Xoán Bosco foi unha realidade…

Comezamos as celebracións compartindo a tradicional oración aberta, o venres 21, xunto a xente da parroquia e catequistas, animadoras, animadores e un grupiño de mozas e mozos de Abertal.

Os Saltimbanquis participaron nunha actividade especial de contacontos; na que tamén puideron colorear e pintar, e gozaron do espectáculo, vendo como parte dos seus animadores e animadoras teatralizaban o conto de El punto, de Peter H. Reynolds.

A sala de xogos volveu cobrar vida a tarde do sábado 22, cun grupiño de 40 mozos e mozas que participaron nos torneos de futbolín e pimpón, con son de fondo do Sevilla-Celta, que acompañaba a intensidade das tres competicións.

O torneo de xadrez, en colaboración con Antigos Alumnos, tamén foi todo un éxito, xa que houbo unha grande participación, especialmente rapazada de Primaria, moita dela doutros colexios da zona.

Os grupos de Catecumenado realizaron unha actividade conxunta o venres 28. Foron 80 as persoas participantes, que se distribuiron en pequenos grupos e foron rotando por diferentes xogos e deportes. Ao final da actividade, recibiron un agasallo doce e unha lembranza de Don Bosco, recuperando unha frase, na súa lingua materna, o italiano: “Abbi cura di te!”.

Non podía fallar nas festas o torneo nocturno FutSal, aínda que nesta ocasión, polas restricións do covid, só puideron participar 15 equipos. A noite alongouse coa emoción das tandas de penaltis, en varios partidos consecutivos. A deportividade e a diversión foron as verdadeiras protagonistas; e moita xentiña nova que tiña ganas de recuperar esta tradición.

O sábado 29, os grupos de Alternativa Vaivén (Saltimbanquis, Andaina e ADS) celebraron unha actividade de portas abertas, a BoscoFest, unha feira de xogos no patio do colexio salesiano, na que se sumou rapazada da cidade.

O 31 de xaneiro, o propio día da festividade de Xoán Bosco, un grupiño de animadores e animadoras participamos na eucaristía da tarde, xunto a outra xente que non quixo faltar á cita, a pesar de ser luns, e día laborable.

En Abertal clausuramos as festas de Xoán Bosco coa maxia dun cacao concerto moi xeitoso. Preto de 60 persoas, dispostas a cantar, en directo ou con axuda de karaoke, e a bailar e celebrar. Unha festa na que non faltou un bo chocolate quente e uns churros, detalle da Churrería-chocolatería Filipo, e dun pai e o seu fillo, que quixeron colaborar deste xeito.

Que alegre e a gusto se sentiría Don Bosco no medio de tanta mocidade!

Viva a maxia de Don Bosco!

Compostela Express – 10 decembro 2021

O grupo de mozos e mozas ADS collía o venres pola tarde un tren rumbo a Compostela. Nada máis chegar, comezaba a derradeira etapa do Compostela Express ata chegar ao albergue salesiano.
Unha fin de semana na que descubrir o equipo gañador desta aventura, gozar da cidade, percorrer xogando as súas rúas e compartir tempo cos compañeiros e compañeiras de ADS, retomando unha xa tradicional aventura na que se mestura o traballo en equipo, intelixencia e superación!
Se pinchas aquí poderás ver algunhas imaxes do ben que o pasaron.

IV Torneo Solidario Baloncesto 3×3 – 3 decembro 2021

Ao redor de 90 participantes e 280 kg de alimentos recadados para a Operación Quilo, son os números que deixan pegada do IV Torneo Nocturno de Baloncesto 3×3 Solidario organizado en colaboración co Club Baloncesto Salesianos Vigo na tarde noite do 3 de decembro . Deporte, solidariedade e algo de competitividade sana fixéronos lembrar o ben que o podemos pasar aínda con máscaras.

Podes ver algunhas fotos aquí.

CampoBosco e DonBosco.com-tigo 28 novembro 2021

Os mozos e mozas non agardaban a morea de sorpresas que lles tiña preparada esa fin de semana en León.

Comezaban unha viaxe en autobús na tardiña do venres 26 de novembro aparentemente longa pero que entre música, conversas e algunha que outra cabezada se lles fixo máis curta.

Nada máis chegar ao destino, sendo conscientes do frío que lles agardaba, déronse unha morea de reencontros calurosos. Amizades que pola Covid non se puideran ver en moitos meses xa que ambos encontros, CampoBosco e DonBosco.comTigo non se realizaban desde o 2019.

O lema do CampoBosco “O camiño apaixonado de Xesús… E o teu?” abríalles as portas aos rapaces e rapzas de entre 16 e 19 anos á unha fonda reflexión sobre as súas eleccións vitais, facendo a proposta cristiá de mirar ao camiño que nos propón Xesús de Nazaret.

Por outra banda, no DonBosco.comTigo se presentou o lema “Coidando da vida” no que se facía a proposta dun estilo de vida saudable en moitos sentidos (cos demais, cun mesmo/a, co mundo, coa natureza, con Deus, etc.) para mozos e mozas de entre 14 e 16 anos.

Unha morea de actividades na que se mesturaban reflexión, oración, dinámica, xogo, coloquio, etc. déronlle forma a unha fin de semana de encontro breve pero intensa.

Para ver as imaxes preme aquí

MagostoRock – 12 de novembro 2022

O venres 12 de novembro pola tardiña xuntámonos para festexar o Magosto, unha das grandes tradicións de Galicia en torno á festa de San Martiño. Puxemos un pouco de leña máis para facer uns bocadillos e así, entre risas e amizades ceamos todos xuntos, mentres que as castañas agardaban nos cucuruchos de papel. 

Xuntámonos antes un equipiño de persoas voluntarias para colocar as mesas, preparar os chourizos, cortar o pan e facer as brasas. Mentras tanto, a Comisión de Música montaba o escenario para con concerto.

Pouco a pouco foron chegando e sobre as 20,30 h. xa comezamos a degustar, compartir, e pásalo ben. Logo de comer as castañas e tratar de ensuciarnos co carbón, demos paso á segunda parte: o Rock. Todos os que quixeran podíanse achegar a cantar ou a tocar algo en grupo ou en solitario.

A lista de temas e artistas afeccionados fixo que foran outros tantos os que se animaran a subir ao escenario sen ensaiar aportando o seu talento, xuntando case dúas horas de concerto.
Pinchando aquí atoparás unhas fotos que dan mostra do ben que o pasamos.

Festa de Mª Auxiliadora en A. Vaivén – 29 maio 2021

O pasado 29 de maio, os grupos de Alternativa Vaivén xuntábanse nunha mañá soleada para gozar e celebrar da festividade de María Auxiliadora. O patio semellaba unha festa, sempre cumprindo todas as medidas sanitarias, en grupos revivimos algunhos dos xa tradicionais xogos destas datas.

Saltimbanquis, Andaina e ADS, participaron por equipos nunha misión imposible con morea de xogos nos que bailar, cantar e disfrazarse daba puntos para gañar un premio final. Ao mesmo tempo, intentando imitar as históricas barracas, un posto de pixlas, outro de chapas personalizadas e karaoke, enchían o patio de música e bo ambiente!

Xa cando remataba a mañá, xuntabámonos para lembrar que era María a que nos convidaba a festexar e vivir con ledicia, achegándolle esa alegría ás persoas da nosa contorna, poñéndolle corazón a todo o que fagamos; sen esquecernos de berrar: Viva María Auxiliadora!!

Pincha aquí para ver algunhas imaxes do ben que o pasamos.

Alternativa Vaivén 17 abril 2021

O 17 de abril de 2021 reuníanse os grupos Saltimbanquis, Andaina e ADS, e continuaron coas súas respectivas aventuras.
Saltimbanquis embarcaba na nave de Among Us para descubrir se había algún impostor ou impostora que estivera saboteando as actividades. E logo de dialogar, debatir e poñerse de acordo entre todas as persoas da nave conseguiron o obxectivo!

Por outra banda, a Cidade Andaina continuou medrando, pero faltaba algo moi importante, as beirarrúas, as farolas, os pasos de peóns, etc. E por iso, antes de continuar con grandes edificios, o equipo de “obras públicas” desenvolveu as melloras para darlle forma á maqueta da cidade.

Na “viaxe polo mundo” do grupo de mozos e mozas ADS, fixeron unha parada en Francia, para aprender das mellores chefs. Unha mañá de cociña, por equipos, para aprender e amosar as habilidades culinarias, con moi bós resultados (que puideron degustar ao final).

Pinchando AQUÍ podes atopar unha escolma de fotos que amosan o ben que o pasaron nestas actividades.

1 2 3 4 22