Un ano máis, o noso centro xuvenil abriu as súas portas aos máis cativos e cativas da casa, nas xa tradicionais “Mañás de Entroido”. Esta edición do campamento infantil, para nenos e nenas de 3 a 12 anos, aberto á cidade, desenvolveuse en dúas únicas xornadas, coincidindo coas vacacións escolares de Entroido, xa que o martes 13 de febreiro foi festivo en Vigo.
Nesta nova edición de Entroido, e xa van doce!, 30 nenos e nenas gozaron da proposta de actividades de Abertal, e as súas familias puideron conciliar vida laboral e familiar.
As actividades desenvolvéronse en horario de 8:30 h. a 14:30 h. cunha oferta variada de obradoiros, como o de creación de máscaras ou cociña tradicional, e xogos, como a busca do Peliqueiro perdido, xogos de Entroido, xogos cooperativos…
Unha vez máis, Abertal quixo ser un lugar para imaxinar, descubrir e crear, fomentar a creatividade, favorecer o compañeirismo e o traballo en equipo, rir… de todo menos de aburrirse.
Un ano máis, a Asociación Xuvenil Abertal e abriu as súas portas aos/ás pequenos/as da casa nas ¨XVI Mañás de Verán¨ e nas “X Mañás de Setembro”. Trátase de dous campamentos de conciliación abertos á cidade, destinados para nenos e nenas dende 4º de infantil ata 2º da E.S.O., que se levan a cabo nos meses de xuño e xullo e na última semana de vacacións escolares de verán, antes de comezar o novo curso.
Esta ano, foi a dezaseisava e décima edición respectivamente, os cales leváronse a cabo do 26 de xuño ao 28 de xullo e do día 1 ao 8 de setembro, de luns a venres en horario de mañá, no que, en total, chegaron a desfrutar 250 nenos e nenas. Deste xeito, as familias puideron conciliar a súa vida laboral e familiar.
As actividades daban comezo ás 08:45 h, e remataban ás 13:30 h, aínda que tamén se ofreceron os servizos de Madrugadores e Friameira.
Nenos/as e animadores/as xuntáronse cada mañá para desfrutar das diferentes actividades propostas. Nas ¨Mañás de verán¨ gozaron de actividades variadas como xogos de auga, excursións, días de praia, diferentes obradoiros, deportes, entre outras. Nas ¨Mañás de setembro¨, cabe destacar que na primeira parte da mañá, os/as participantes puideron escoller entre diferentes actividades como entrenamento de fútbol ou baloncesto, grazas a colaboración de ambos clubs, ou a actividade proposta por Abertal na que que se fixeron diferentes obradoiros como cociña, arxila, pulseiras e ata unha visita a comisaría da Policía Local de Vigo. Xa na segunda parte da mañá, todos/as xuntos/as puideron gozar de diferentes actividades como excursións ao visor submarino Nautilus, ao Centro Arqueolóxico Salinae, ao Centro de Visitantes do Parque Nacional das Illas Atlánticas de Galicia, visita interxeracional dun grupo de persoas de Atendo, así como diferentes xogos e obradoiros que se levaron a cabo tanto no exterior como nas propias instalacións.
Pola gran acollida que están tendo as ¨Mañás de¨, nas que ano tras ano vese como vai aumentado o número de participantes, queremos que Abertal siga sendo un lugar para imaxinar, descubrir e crear, fomentando a creatividade, o compañeirismo e o traballo en equipo, rir … de todo menos aburrirse.
Seguinte parada, Mañás de Nadal! Vémonos na vindeira cita, para seguir apoiando ás familias e gozar coas rapazas e rapaces dun tempo libre lúdico e educativo!
O Centro Xuvenil Abertal non para nin no mes de agosto. De feito, do 31 de xullo ao 11 de agosto organizou unha das actividades con máis tradición, o Campamento Urbano, que neste 2023 chegou á súa edición número 35. Unha vez máis cumpriu o seu obxectivo de ser unha proposta aberta á cidade, totalmente libre e cento por cento gratuíto.
Así, durante dúas semanas participaron, como verdadeiros protagonistas, un bo número de rapaces e rapazas organizados en grupos por idades de 7 a 15 anos e acompañados por un nutrido grupo de voluntariado cheo de ilusión. Pero os de Vigo non foron os únicos en contar co seu Campamento Urbano. Así quedou demostrado na Xuntanza de Campamentos Urbanos de Galicia, que se celebrou na praia de Samil o 3 de agosto, reunindo a máis de mil participantes nos campamentos urbanos da Federación de Centros Xuvenís Don Bosco de Galicia. Xogos de auga, obradoiros, actividades en diferentes barrios da cidade, unha excursión a Cangas… completaron esta experiencia única de verán. Unha proposta que se consolida e que atendeu á conciliación familiar, ampliando o horario habitual de actividades para quen o precisaba.
Parecen poucos, pero xa son unha chea de anos facendo realidade esta proposta de tempo libre educativo, sen renunciar ás orixes. Un campamento urbano libre, gratuíto e aberto. Un campamento na cidade como recurso de lecer, no que os rapaces e rapazas sexan os verdadeiros protagonistas.
Por segundo ano consecutivo, volvemos organizar o campamento nas instalación do colexio salesianoMª Auxiliadora, do 31 de xullo ao 11 de agosto, e contaremos cun nutrido grupo de voluntariado, que contaxiarán de ilusión as actividades deste verán.
A inscrición estará aberta, mesmo durante o desenvolvemento do propio campamanento, para rapaces e rapazas de 7 a 15 anos.
As actividades serán variadas: paseos polos barrios da cidade, xogos de auga, obradoiros, viaxe en barco pola ría, xogos en grupo, actividades na natureza, praia e xuntanza cos outros campamentos urbanos da Federación de Centros Xuvenís Don Bosco de Galicia.
Todo en marcha para esta nova edición, que tamén atenderá as necesidades de conciliación das familias, con servizos de Madrugadores e Friameira, e que pretende ser unha oportunidade para rapaces e rapazas que non poden participar noutros campamentos este verán.
Un ano máis, Abertal organizou as XI Mañás de Semana Santa, campamento de conciliación, neste período de vacacións escolares, e aberto á cidade, para nenos e nenas de 3 a 12 anos. Nesta edición participaron en torno a 60 nenos e nenas, que gozaron das súas vacacións de Semana Santa en Abertal.
As actividades daban comezo ás 08:45 h, e remataban ás 13:30 h, aínda que tamén se ofreceron os servizos de Madrugadores e Friameira.
O luns 3 de abril comezamos cunha xornada de xogos de presentación, onde os rapaces e as rapazas de cada grupo puideron coñecerse un pouquiño, xa que ían compartir tempo de xogo durante todo o campamento. Na segunda parte da mañá, para dar a benvida á primavera, fixemos unha sesión de relaxación, e tamén houbo ocasión para aprender a plantar nunhas macetiñas; primeiro as decoraron ao seu gusto e despois plantaron cebolas, amapolas e xirasoles.
O martes 4 de abril comezou cunha saída ao Castro, na procura de elementos da natureza que, unha vez localizados, foron devoltos a ela. Na segunda parte da mañá, despois da relaxación, os rapaces e rapazas participaron nun circuíto no que puxeron a proba a súa puntería.
Comezamos o 5 de abril cunha xincana, a través dun circuíto, superando unha serie de obstáculos. Despois tocou merendar, tempo de relaxación e sesión de cociña; puxémonos mans á obra cos ósos de santo.
Á volta dos festivos, o luns 10 de abril, volvemos ao Castro, pasando a mañá alí, xogando e merendando. A segunda parte da xornada, xa en Abertal, realizamos a última actividade do campamento, na procura dos ovos de Pascua polas instalacións do patio do colexio Salesianos.
Seguinte parada, Mañás de Verán!
Vémonos na vindeira cita, para seguir apoiando ás familias e gozar coas rapazas e rapaces dun tempo libre lúdico e educativo!
Quen coñece a traxectoria do noso centro xuvenil pode facerse unha idea de por que hai actividades que se converten en máxicas.
Cando a escasos dez días de comezar esta nova edición do campamento urbano, se nos comunica que mudan as “regras de xogo”, e que temos que botar a andar un campamento desde cero, en novas instalacións e facendo unha nova convocatoria, pouca xente confiaba en que isto fose factible.
En tempo récord deseñamos un cartel e fixemos convocatoria a través das nosas redes sociais e o boca a boca, que foi o que realmente funcionou. E aí xurdiu o milagre… 170 incricións, cunha media diaria de 120 persoas participantes, e unha proposta xeitosa de actividades.
Ver gozar a rapaces e rapazas dunha simple viaxe en barco, de Vigo a Cangas porque, se cadra, había quen nunca viaxara en barco… Iso é maxia.
Ver compartir verán a rapaces e rapazas de diversas procedencias, mesmo de Ucraína, e ver que hai un idioma común e de entendemento, que é o do xogo e a diversión… Iso é maxia.
Ver como o equipo de 75 persoas voluntarias se reinventaba cada día para ilusionar a estes rapaces e rapazas… Disfraces, coreografías, personaxes, aventuras, retos e máis retos… Ese mesmo equipo, que varias tardes á semana participaba no Urbano Xuvenil, como persoas destinatarias, coa mesma ilusión que un neno/a, descansando pouco e madrugando moito para o día seguinte… Un equipo incansable, dispoñible, que celebrou cada momento deste campamento e que chegou a converterese nunha pandilla de amigos e amigas… Iso é maxia.
Contar co apoio desinteresado de varias familias e particulares que fixeron varias doazóns para este campamento urbano, e conseguir que saia un pouco menos deficitario… Iso é maxia.
Grazas á cidadanía que confía no noso xeito de facer as cousas, no noso estilo educativo, que nos felicita polo traballo feito e que apoia as nosas iniciativas, ano tras ano, verán tras verán!
O Campamento Urbano de Abertal, que leva por título “Ti, protagonista”, chega ao seu ecuador.
Cunha media de 110 participantes, esta semana realizaron actividades variadas: olimpíadas deportivas, xogos de auga, excursión á praia e peregrinaxe polo Castro. Malia a calor destes días, os rapaces e rapazas compartiron as mañás xogando, cantando e gozando coas diferentes actividades, e coñecendo a máis xente da súa idade.
Esta semana tamén deu comezo o VIII Campamento Urbano Xuvenil, unha proposta de ocio, en horario de tarde, para mozos e mozas a partir de 16 anos. Moitas das persoas participantes son tamén preanimadores/as e animadores/as que, en horario de mañá, animan aos rapaces e rapazas do Urbano Infantil. Esta semana participaron nun karaoke, serigrafiaron camisetas e gozaron dunha tarde de xogos de auga. Rematarán a semana realizando un “Urbano Exprés” pola cidade.
Este ano o Campamento Urbano non conta con financiamento público. Abertal segue apostando por unha proposta educativa de ocio e tempo libre inclusiva e diversa. Un campamento aberto, libre e gratuíto.Autocares Galisur colaborou coas viaxes da excursión á praia, facéndonos un desconto ben xeneroso. E xa estamos recibindo algún donativo de particulares. Grazas por colaborar connosco!
O luns retomaranse as actividades de ambos campamentos, e as inscricións seguirán abertas durante toda a semana.
Non queremos rematar sen agradecer a súa dedicación ao grupo das 60 persoas voluntarias, cadaquén ofrecendo o tempo do que vai dispoñendo e, sobre todo, a súa experiencia, o que impregna de calidade esta vivencia de verán.
