ABERTAL organiza este campamento, que vai dirixido a rapaces e rapazas desde os 6 anos (ano de nacemento: 2017) ata os 15 anos (ano de nacemento: 2009) e que se desenvolverá do 1 ao 14 de agosto (de luns a venres) nas instalacións do Centro Xuvenil Abertal e do Colexio Salesianos (Rúa Venezuela, 3), en horario de 09:00 h a 14:00 h.
Este campamento urbano é de caracter gratuíto. O prazo de inscrición estará aberto, ata completar prazas.
Unha cidade na que os rapaces e rapazas se sintan protagonistas e gocen do verán. Unha cidade como recurso lúdico, ao servizo da cidadanía máis esixente, os nenos e as nenas.
ABERTAL leva 36 anos organizando campamentos urbanos na nosa cidade. Unha chea de nenos e nenas pasaron polas súas actividades e gardan un grato recordo destes campamentos. Moitas das persoas participantes pasan a ser, anos despois, monitores e monitoras do campamento. Unha espiral que medra e que dá senso a unha proposta de ocio e tempo libre educativo, e que ten continuidade nas actividades que a asociación brinda á cidade ao longo de todo o ano.
Un nutrido grupo de voluntarios e voluntarias están preparando, con moita ilusión, a nova edición deste campamento. Un voluntariado que nunca falla á súa cita co Urbano, verán tras verán. Unha proposta educativa e de lecer cun estilo propio.
Días contados para acoller a todos eses rapaces e rapazas que queiran participar no campamento.